31, జులై 2012, మంగళవారం

ఒక వాన చినుకు!!

ఒక చిన్నిచినుకు....

మిలమిలా మెరిసిపోతున్న వాననీటి తళుకు...

నీలిమేఘాల కురులసిగలో విరిబాలగా వెలుగుతుంటే..

చల్లనిగాలి వచ్చి చెక్కిలి నిమిరి చక్కలిగింతలు పెట్టగానే...

జలజలా జారి...మధుమాసపు మంచుపూవై రాలి..

నేలమ్మ నులివెచ్చని కౌగిలిలో చేరే వేళ...

పచ్చని ఆకుల పొదరిల్లోకటి సాదరంగా ఆహ్వానిస్తే..

చిగురుటాకుల ఒడిలో సేదదీరి....

కమ్మని మన్నుపరిమళం అనుభవిస్తుంటే...

రంగురంగులరెక్కల కోక ఒకటి వస్తే...

నీకు రంగుల లోకం చూపిస్తా వస్తావా అంటే...

సర్రున జారి.... సీతాకోకరంగుల్లో కలిసిపోయి...

తోటంతా తిరిగి.... ఆటలెన్నో ఆడుకుని... పాటలెన్నో పాడుకుని...

మలిసందె వెలుగు మసకపడే మునిమాపటివేళ...

కోకమ్మ సెలవు తీసుకుని..... మల్లెపొదలో జారవిడిస్తే...

మల్లెపూల రెక్కలపై చిరురవ్వల ముక్కెరైపోయి...

మల్లెభామ మత్తులో తూగి... సందెగాలి పాటలో ఊగి...

రాతిరమ్మ చుక్కలపందిరి కింద వెన్నెలభోజనాలు పెట్టే వేళ...

జాబిలమ్మ వెండి ఊయలలో ఊరేగుతుంటే......

వెన్నముద్దల్లా విచ్చుకున మల్లెపూలతోటలోకి...

 
వయ్యారంగా నడిచి వచ్చిన ఒక చక్కనిచుక్క...

అరవిచ్చిన మల్లెల్లో అచ్చంగా ఒదిగిపోయిన వానచినుకుని చూసి...

మురిసి.....ఆమె మోమున ముద్దబంతిపువ్వు విరిసి...

మత్తెక్కించే  మల్లెలను అరచేతుల్లో పోదివిపట్టుకుని...

ముచ్చటైన ముత్యపుచినుకును ముద్దాడగానే....

 వెల్లకిల్లా ప్రేమలో పడ్డ వానచినుకు....

'ఈ జన్మకిది చాలు' అనుకుని మెల్లగా నేలతల్లి ఇల్లు చేరుకుంది....






-ఇందు

[Imagesource:Google]

14, మే 2012, సోమవారం

శ్రీమతికి ప్రేమలేఖ!

ప్రియాతిప్రియమైన శ్రీమతికి,

నా చేత ప్రేమలేఖ వ్రాయించుకునే అదృష్టం నీదే మరి :) ఎందుకంటే..... ఇదే నా మొట్టమొదటి ప్రేమలేఖ ;)

అలాగని నేను శ్రీ రామచంద్రుణ్ణి అని చెప్పలేను.... నా రేంజికి తగ్గట్టు ఏదో ఒకరో,ఇద్దరో గర్ల్ ఫ్రెండ్స్ ఉన్నా... ఇదిగో ఇలా అర్ధరాత్రి మూడింటికి నిద్రపట్టక ప్రేమలేఖ రాయాలనిపించే సీన్ ఐతే లేదు అమ్మడు ఎవ్వరికీ :)))

ప్రేమలేఖ... అంటే ఏం రాయాలి??? మనం ప్రేమికులం కాదు కదా!! పోనీ పెళ్ళికి ముందు తెగ ఫోన్లు చేసుకుని మాట్లాడుకున్న వాళ్ళమూ కాదాయె! కానీ ఏదో రాయాలని ఆరాటం. నా రాతల్లో నిన్ను చూసుకోవాలని ఉబలాటం. పోనీ కవితలు రాద్దామంటే.... మనకి కపిత్వం తెల్సుగాని... కవిత్వం తెలీదే! పాటలు రాద్దామంటే.... ఆ పాండిత్యమూ లేదు! అందుకే.... నా మనసులో ఇప్పటికిపుడు నీగురించి వచ్చిన ఆలోచనలన్నీ అక్షరాల్లో పెట్టేస్తున్నా! సరేనా?!

అదిసరేగాని, అసలు ఏం మాయచేసావ్ నన్నూ?? పోనీ నిన్ను చూసిన మొదటిసారే డుబుక్కున ప్రేమలో పడిపోయాను అంటే అదీ కాదు... [నిజం చెప్పేసా ఏమి అనుకోకు ;) ]

కానీ, మన నిశ్చితార్ధం రోజున నీ చేతి వేళ్ళు చూడగానే మాత్రం ముద్దొచేసాయంటే నమ్ము! మరీ ఎక్కువసార్లు చూశానేమో రెండుమూడు రోజులు కల్లో కూడా అవే వచ్చాయ్ ;) ఆ చేతివేలికి ఉంగరం తొడిగే అదృష్టం నాదే అంటేనే అదొక గొప్ప ఫీలింగ్.... ఎవరెస్టు అధిరోహించేసినట్టు!!

అలాగే మన పెళ్లి ఇంకో రెండురోజుల్లో ఉందనగా.... ఆరోజు మీఇంట్లో చెప్పకుండా నాతో పాని-పూరి తినడానికి వచ్చావు చూడు.... ఆ రోజైతే... ఎవరన్నా చూస్తారేమో అని భయపడుతూ బెరుకుగా చూస్తున్న నీ కళ్ళు, ఆవురావురుమంటూ ఒక్కొక్క పూరిని అమాంతం మింగేస్తున్న నీ బుజ్జి నోరు, ఆ పాని ఘాటుకి ఎరుపెక్కిన నీ కోటేరేసిన ముక్కు.... చూస్తుంటే.... ఎంత అబ్బురమనిపించిందో! హ్మ్! ఎంతైనా నువ్వు అందగత్తెవే!! ఒప్పుకోక తప్పట్లేదు మరి ;)

ఇక పెళ్లిరోజున చూడాలి.... ఆ మెరూన్ కలర్ కంచిపట్టులో.... ఆ బుట్టలో కూర్చుని నువ్వొస్తుంటే.... నాకైతే ఎర్రటి గులాబి బంతిని తెస్తున్నారేమో అనిపించింది. అంతలోకే నీకు-నాకు మధ్య తెర కట్టేసి.... జీలకర్ర బెల్లం పెట్టే వరకు అసలు నిన్ను చూడనివ్వలేదు. ఎంత కోపమొచ్చిందో ఆ పురోహితుడి మీదైతే! జీలకర్ర బెల్లం పెట్టేశాక.... హమ్మయా అనుకున్నానా.... అంతలోకే మధుపర్కాలన్నారు నిన్ను పట్టుకోపోయారు అమ్మలక్కలంతా కలిసి! :( మళ్లీ మొహం మాడ్చేసుకుని కూర్చున్నా!

కానీ ఆ తర్వాత తెల్లని మధుపర్కాలలో అచ్చం రాజహంసలా నువ్వొస్తుంటే.... నాకు రెండు రెక్కలు కట్టుకుని నీతోపాటు ఆకాశవీధిలో విహరించాలనిపించిది!! నీకు తాళి కట్టే వేళ... నువ్వెంత టెన్షన్ పడ్డావోగాని, నేనైతే అరవీరభయంకరంగా పడ్డా! ఎందుకు అని అడగవేం?? ఏంలేదు... ఎక్కడ సినిమాల్లో చూపించినట్టు,.... 'నో... ఆపండి.. నహీ' లాంటి డైలాగ్ కోడతావేమో అని ;) [హ్హహహ్హ! ఉడుక్కుంటున్నావా?? ఊర్కే అన్నాలెద్దూ!! :)) ] ఇక పోతే.... తలంబ్రాలప్పుడు తెలిసింది నీ గడుసుదనం!! అమ్మో.... ' "అమాయకురాలు" అనుకున్నా.... ఆ పదంలో 'అ' తీసేయాలి ' అని అనిపించింది తెల్సా? ;) కానీ, అప్పగింతలప్పుడు నువ్వేడిస్తే నాకేం బాలేదు అమ్మాయ్! నీ కళ్ళలో అలా నీళ్ళు చూడలేను నేను :( 

అయినా, మనిద్దరి పరిచయం ఎంతా?? ఒక్క వారం కదా! ఒక ఆదివారం నిశ్చితార్ధం ఐతే.... నెక్స్ట్ ఆదివారం పెళ్లి. అస్సలు అనుకోలేదు నా జీవితంలో ఇంత ఫాస్ట్ గా పెళ్లి చేసుకుంటా అని ;) ఫాస్ట్ గా కాదు... సూపర్ ఫాస్ట్గా అని చెప్పాలేమో!! హ్మ్! ఏంచేస్తాం! మా డామేజరు సరిగ్గా 15 రోజులు ఇచ్చాడు సెలవులు!! హ్మ్! ఏ బంధమైనా కాలంతో పాటు పెరుగుతుంది. కానీ... మన మధ్య అదేంటో చిత్రంగా ఇంత తక్కువ టైమ్లో అల్లేసుకుంది.  

పెళ్ళైన మూడోరోజే నేను అమెరికాకి బయలుదేరితే.... నీ కళ్ళలో దిగులు చూస్తే.... ఎంత ఆనందమేసిందో తెల్సా? అవును మరి!! నాకోసం ఆలోచించే మనిషి ఒకరున్నారనే భరోసా ఆ దిగులే! నన్ను కావాలనుకునే వాళ్ళు ఉన్నారనడానికి సాక్ష్యం ఆ దిగులే! అందుకే నాకు అది నచ్చింది. కానీ ఆ దిగులు నాకూ అంటుకుని ఇదిగో ఇలా వేధిస్తోంది!! మన పెళ్లి, నీతో గడిపిన ఆ రెండురోజులు ఇవే నాకు ఇప్పుడు తిండి-నీళ్ళు-నిద్ర.... తెల్సా?? ఎన్నిసార్లు నీ ఫోటో చూసినా... ఎంతసేపు నీతో ఫోన్లో మాట్లాడినా....ఆదివారాలు స్కయిప్ చాట్ చేసినా... ఏదో వెలితి గుండెని మెలిపెట్టేస్తోంది. 

నీకో సీక్రెట్ చెప్పనా? అసలు పెళ్ళంటేనే నాకు చిరాకు. హాయిగా బ్యాచిలర్ లైఫ్ ఎంజాయ్ చేస్తున్న నన్ను... మా అమ్మ 'అమ్మాయి బంగారంలా ఉంది. చిదిమి దీపం పెట్టుకోవచ్చు. ఒక్కసారి ఫోటో చూసి చెప్పరా!' అంటే.... ఇల్లదిరిపోయేలా అరిచా... 'అప్పుడే నాకు పెళ్ళేంటి?' అని. నీ ఫోటో చూపిస్తే చిరాగ్గా చూసి... 'మ్..సరే' అని ముక్తసరిగా సమాధానం చెప్పా! ఏదో ఒకటి పెళ్లి చేసుకుంటే ఈ టార్చర్ తప్పుతుందని. కానీ.... నిజ్జంగా నిజం.... మొదటిసారి నిన్ను చూసినప్పుడు మాత్రం.... మా అమ్మ టేస్ట్ మెచ్చుకోకుండా ఉండలేకపోయా! కానీ మీ అమ్మ, మా అమ్మ ఫ్రెండ్స్ అని.... నీకు నేను ఆరు నెలల ముందే తెల్సు అని తెలిసేసరికి.... అస్సలు నమ్మలేకపోయా! ఆరునెలల నించి నామీద పధకం రచించారన్నమాట మీరంతా కలిసి ;)

నీకేమి గిఫ్ట్ ఇవ్వలేదు నేను... ఇంతవరకు. కానీ నువ్విచ్చిన నీ డైరి.... అందులో నువ్వు దాచుకున్న నెమలీక.... గులాబి రేకులు... వాటిమీద మనిద్దరి పేర్లు..... డైరీలో నాగురించి నువ్వు రాసుకున్న ఊహలు, ఊసులు , కవితలు,........... హ్మ్! రోజుకి కనీసం ఒక పదిసార్లైనా నీ డైరి తెరుస్తా! రోజుకొక పేజి చొప్పున చదువుకుంటూ వస్తున్నా! నువ్వోచ్చేవరకు ఈ డైరి నే నా ఆలనాపాలనా చూసేది మరి :( కానీ.... నీకు అంత నమ్మకమేంటి నామీద? నేను నిన్ను పెళ్లి చేసుకుంటా అని?? ఆ? ఎంత గడుగ్గాయివో!! ఎలాగైతేనేం.... బుట్టలో వేసేసుకున్నావ్ నన్ను!! హాన్నా!

అందుకే నీకోసం ఈ ప్రేమలేఖ వ్రాస్తున్నా! ఇదే నేను నీకివ్వబోయే మొదటి గిఫ్ట్ :) నాగురించి అన్ని రాసుకున్నావ్ కదా నువ్వు.... కానీ నీగురించి రాద్దామంటే..... నీ ఊహల్లో మునిగిపోవడమే తప్ప.... కాగితం మీద కలం కదిలితేనే కదా! ఇదిగో... ఇన్నాళ్టికి అర్ధరాత్రి కుదిరింది ముహూర్తం :)) ఎప్పుడో మర్చిపోయిన అక్షరాలన్నీ కూడబలుక్కుని రాస్తున్నా! నీ అంత అందంగా,కుదురుగా రాయడం కుదరట్లేదు... తిట్టుకోవు కదా! ;)

నేను పెళ్ళికి ముందు.. ఇలాగే ఒంటరిగా ఉండేవాడిని. ఇప్పుడూ నా పరిస్థితిలో మార్పు లేదు. కానీ నా మనసులో మాత్రం బోలెడు మార్పు. చెప్పలేనంత మార్పు. ఆఫీసు-తిండి-నిద్ర తప్ప పట్టని నాకు.. ఊహలు నేర్పావు. కవితలు నేర్పావు. ప్రేమించడం నేర్పావు. విరహం అంటే ఏమిటో చూపిస్తున్నావు. ఇదిగో.... ఇలా ప్రేమలేఖ కూడా రాయించేస్తున్నావు!! 


ఇన్ని ఇచ్చిన నా నెచ్చెలీ... నా దగ్గరికి తొందరగా వచ్చెయవూ??

వచ్చేస్తావు కదూ.... బంగారం!

నీకోసం ఎదురు చూస్తూ.... 

నీ శ్రీవారు!



10, ఏప్రిల్ 2012, మంగళవారం

గుళ్ళో ప్రసాదం ;)

ఆ... టైటిల్ చూసి నోరూరిన  జనతాలో మీరు ఉన్నట్టైతే.... డౌట్ లేదు... మీరు నా క్యాటగిరి నే :)
మరేమో.... అసలు సంగతేంటంటే......

మొన్నామధ్య   నేను, చందూ ఆఫీసునించి సరాసరి రెస్టారెంట్ కి వెళ్లాం :)) బాగా ఆకలిమీదున్నామేమో.... ఒక నాలుగు రకాలు ఆర్డర్ చేసాం ;)

మా ఖర్మకాలి..... మంగళవారం అన్నీ రెస్టారెంట్లకి సెలవు మేము వెళ్ళింది తప్ప :( ఇక జనాలు పొలోమంటూ ఈ రెస్టారెంటుకి క్యు కట్టారు :(((

ఒక పక్కన కడుపులో కుందేళ్ళు పరిగెడుతుంటే.... ఏం చేయాలో తోచక.... అప్పటికే కొరికేసిన గోళ్ళని గిల్లుకుంటూ కాసేపు కాలక్షేపం చేశాం. ఇక లాభం లేదని.... ఏదో ఒక టాపిక్ మాట్లాడుకుంటేగాని ప్రశాంతత చేకూరదని.... ఇక తిండి టాపిక్  మొదలెట్టాం!

"అసలు ఇందు.... రాజమండ్రిలో టమాటా బజ్జి ఉంటుంది....."

"చందూ..ప్లీజ్.... ఇది వందో సారి. గుంటూరు మూడొంతెనల దగ్గర మిరపకాయ బజ్జి ఎంత బాగుంటుందో... మీ రాజమండ్రిలో టమాటా బజ్జి అంత బాగుంటుంది. సరేనా? ప్లీజ్.... టాపిక్ చేంజ్"

"హుహ్!....."

"సరే.... నేను చెప్తాలే.... మా ఆఫేసులో నా కొలీగ్  ఒకాయన  ఉన్నారు. ఆయనకి ఫుడ్  ఇంటరెస్టింగ్ టాపిక్ ;)  ఏది ఎలా చేయాలి.... ఎలా తినాలి.... అనేవాటి మీద  మంచి డిస్కషన్స్ పెడతారు. ఆయనకి అన్నిటికంటే నచ్చేది ఏదో తెల్సా??.. గుళ్ళో పులిహోర అట "

"హ్హహ్హహ్హా! మరే.... గుళ్ళో పులిహోర అల్టిమేట్ ఇందు....ప్రసాదాల్లో పులిహోర, చక్రపొంగలి నంబర్ వన్ అసలు. ఒక్క చిన్న స్పూన్  తిన్నా కూడా అమృతంలా ఉంటుంది."

"అవును మరి. దేవుడు ఎంగిలి చేస్తాడేమో.... మంచి రుచిగా ఉంటుంది :). నాకు ఆ చక్రపొంగలి వాసనకే నోరూరిపోతుంది. "

"ఏమోగాని..... ద్రాక్షారామంలో ప్రసాదం మాత్రం సూపర్! దానికి తిరుగులేదు. అసలు దానిని మించి టేస్టీ  ప్రసాదం ఇంకోటి తినలేదనుకో"

"నాకు అది భలే ఇష్టం. ఎంత బాగుంటుందో! అన్నవరం ప్రసాదం తిన్నావా ఎప్పుడైనా?"

"ఆ... అది కూడా కేక! కానీ ద్రాక్షారామం అంత కాదనుకో ;) "

"నిజమే! ఆ ద్రాక్షారామం ప్రసాదం కోసం నేను మూడు సార్లు వెళ్ళా అక్కడికి ;) అసలు నెయ్యి కారుతూ ఉంటుంది. ఆహా!"

"హ్మ్! నాకైతే.... గుడి అంటే ముందు ప్రసాదమే గుర్తొస్తుంది ఇందు. నువ్వు తిట్టుకున్టావ్లె .... కానీ.... నేను మాత్రం  ప్రసాదం బాచ్!" :))

"హ్హహ్హ!! అంతలేదులే.... నిజం చెప్పనా?? మళ్లీ ఎవరికీ చెప్పొద్దూ.... నేనూ సేం పించ్ ;) నాకు గుళ్ళో ప్రసాదం అంటే భలే ఇష్టం!... అసలు గుళ్ళో దేవుడి దర్సనం అయిపోయాక... కళ్ళన్నీ ప్రసాదం మీదే! "

"హ్హేహ్హే! నాకు తెల్సులే! నువ్వెప్పుడు గుడికి వెళ్ళినా  ..... దేవుడికి దణ్ణం పెట్టుకున్తున్నట్టే  ఉంటావ్ కానీ .... ఆ దేవుడి ముందు పెట్టిన ప్రసాదాల వైపే నీ చూపులన్నీ"

"ఏదో నీ అభిమానం ;) ఇది కాదుగాని..... నేను ఇంజినీరింగ్ చదివేటప్పుడు.... మా హాస్టల్ ఫ్రెండ్స్ అందరం.. ప్రతి మంగళవారం, శుక్రవారం ఆంజనేయస్వామి గుడికి వెళ్ళేవాళ్ళం. మా హాస్టల్కి రెండు వీధుల అవతల ఒక గుడి ఉండేది. అది నా ఫేవరేట్. అక్కడ ఈ మంగళవారం/శుక్రవారం రోజుల్లో.... చక్కగా చింతపండు పులిహోర, ఆరెంజ్ కలర్ రవ్వకేసరి విత్ జీడిపప్పు+కిస్మిస్+నెయ్యి.... వహ్!! అసలు సూపరనుకో ;) నేనైతే.... మా ఫ్రెండ్స్ వేరే గుడికి వెళ్దామన్నా.... పట్టుపట్టిమరీ ఈ గుడికే తీసుకెళ్ళేదాన్ని.... దేవుడి మీద భక్తీ అనుకునేది మా హాస్టల్ వార్డెన్... ప్రసాదం మీద అనురక్తి అని వాళ్ళకి తెలీదుగా ;) "

"ఆ..... ఆంజనేయస్వామికి మెడలో వేస్తారు చూడు అప్పాలు.... అబ్బ.... ఆ టేస్ట్ అసలు అన్బీటబుల్!"

"అప్పాలా..... అవి బాగుంటాయని నువ్వంత  మొహమాటంగా చెప్పాలా? ;) "

"హహ!! 'అతడు' డైలాగ్ కదా...సూపర్ సినిమాలే. ఏదీ ఏమైనా కానీ అన్నిటికంటే తిరుపతి లడ్డు ప్రసాదం హైలైట్ "

"హా! నిజమే! తిరుపతి అంటే గుర్తొచింది.... శ్రీశైలంలో అమ్మవారిగుడి దగ్గర రాత్రిపూట పూజ అయ్యాక ప్రసాదం పెడతాడు.... ఆహా.... అల్టిమేట్ అసలు. జస్ట్ ఉప్పు+పోపు వేసిన దద్దోజనం ఉంటుంది... వేడివేడిగా.... అబ్బబ్బా!! నోరూరుతుంది చెబుతుంటేనే! అలాగే... ఆ చింతపండు పులిహోర.... దేవుడా! అందులో ఊరిన ఆ ఎండు మిరపకయలైతే ..... సూపరేహే!"

"నాకు శివాలయాల్లో శివుడికి అభిషేకం చేస్తారు.... 'పంచామృతం' .... అది భలే ఉంటుంది ఇందు :) ఆ టేస్ట్ అసలు ఎలా వస్తుందో.... ఎంత సింపుల్ ఇంగ్రీడియంట్స్ కదా!"

"అవును చందూ.... ప్రసాదాల రుచే వేరు. మొన్నామధ్య మనం పిట్స్ బర్గ్ వెళ్ళినప్పుడు కూడా... ఫుల్లు కుమ్మేసాంగా  అసలు. ప్రసాదం కోసమే గుడికి వెళ్ళినట్టుగా ఉంది." ;)

"సంపత్ ఐతే... ఎప్పుడు హారతి ఇస్తారా.... ఎప్పుడు ప్రసాదం కౌంటర్ వైపు వెళ్దామా అనే!"

"హ్హహ్హ!! నాకు అరోరా టెంపుల్ లో కూడా ప్రసాదం బాగా నచ్చింది. నాచేత డేడ్లి ఇడ్లీ తినిపించాడు వాడి పల్లి  చట్నీ తో! వాడి తరువాతే ఎవరైనా"

"కదా!ఆరోజు సాంబార్ కూడా కత్తిలా ఉంది. ఇంకోసారి వెళ్ళాలి ఇందు షికాగోకి. కనీసం ప్రసాదం తినడానికైనా!! "

" :))) నాకు ఇస్కాన్ ప్రసాదం కూడా నచ్చుతుంది చందూ. ఆరోజు గోల్డెన్ టెంపుల్ లో భలే ఉంది కదా! బెంగుళూర్ ఇస్కాన్లో స్వీట్స్ ఉంటాయి.... వావ్... అసలు పండగే అనుకో"

"అక్కడ ఫుడ్ చాలా బాగుంటుందిరా! 'సండే ఫీస్ట్' ఐతే.... కేక! బ్యాచలర్స్ కి ఒక పూటకి కడుపునిండా భోజనం అన్నమాట ;) "

"హ్మ్! ఎన్నిసార్లు వెళ్ళావ్ బాబు..."

"అబ్బో... లెక్కలేనన్ని....."

"దేవుడి మీద భక్తా? ప్రసాదం మీద ప్రీతా??"

"అది ఇంకా చెప్పాలా? "

"హయ్యో రామా.."

"ఇస్కాన్లో ఉండేది కృష్ణుడు తల్లి... రాముడు కాదు.... అంటే నీ దృష్టి దేవుడి మీదా.... చిత్తం ప్రసాదం మీద అన్నమాట"

"హతవిధీ!"



"సర్ యుర్ ఆర్డర్" అనుకుంటూ............. తీసుకొచ్చాడు.... ఎపటైజేర్.

 'అహనా పెళ్ళంట' సినిమాలో కోటా లాగా........ అప్పటిదాకా మేము డిస్కస్ చేసుకున్న ప్రసాదాల రుచులన్నీ ఊహించుకుంటూ..... ఇద్దరం ఏదో తినేసి బైట పడ్డాం!


అవండి.... మా గుళ్ళో ప్రసాదం గోల.... మరి మీ సంగతేంటి????  ;)

Photos  Courtesy: Google 

14, ఫిబ్రవరి 2012, మంగళవారం

ఇష్టాలే కష్టాలైపోతే?

ఒక సెలవురోజున భోరున వర్షం కురుస్తోంది.

మీరు ఎప్పటిలాగే  వేడివేడి పకోడీ చేసుకుని, ఒక పెద్ద మగ్గునిండా టీ నింపుకుని కిటికీ/బాల్కనిలో కూర్చుని వర్షాన్ని ఆస్వాదిస్తూ, నోటికి పని కల్పిస్తున్నారు.

ఇంతలో చిన్న మూలుగుడు వినిపిస్తుంది. మీ చెవులు అసలే షార్పు కదా! చటక్కున లేచి రోడ్డుమీదకి చూస్తారు.

అక్కడ ఒక బుజ్జి కుక్కపిల్ల  చలికి వణికిపోతూ ఉంటుంది. మీ గుండె అది చూసి కరిగిపోతూ ఉంటుంది.

వెంటనే మీకు సమాజ సేవ,పెటా,బ్లూ క్రాస్  లాంటివికి కళ్ళముందు 70 .ఏం.ఏం. స్క్రీన్లో కనపడతాయ్! ఇక వెంటనే మీలో రక్తం ఉరకలు వేసి గొడుగు కూడా మర్చిపోయి పెద్ద పెద్ద అంగలేసుకుంటూ వీధిలోకి వెళతారు.

ఎదురింటి అబ్బాయి/అమ్మాయి మిమ్మల్ని గాని చూస్తుంటే ఇంకా రెచ్చిపోయి పరిగెత్తుకుంటూ వెళ్లి ఆ కుక్కని అక్కున చేర్చుకుంటారు. అది జాలికళ్ళతో మిమ్మల్ని చూడగానే మీ హృదయాంతరాలలో దాగున్న జంతుప్రేమ ఒక్కసారి వరదమూసినదిలా ఉప్పొంగిపోతుంది.

అది 'కుయ్యో మర్రో' అన్నా మీకు చిలకపలుకుల్లాగే ఉండి దాన్ని నిమురుకుంటూ ఇంట్లోకి తెస్తారు. 

దానికి ఒక టవల్ చుట్టి దుప్పటి మీద బజ్జోపెడతారు. ఆ కుక్క ఎప్పటినించి ఉగ్గబట్టుకుందో ఒక్కసారిగా మీ దుప్పటిని,మీ మంచాన్ని ఖరాబు చేసేస్తుంది.

అయినా మీ మూడ్ సూపరుగా ఉంది కాబట్టి, ఇప్పుడిప్పుడే మీ కుక్క మీద కలిగిన తొలివలపు కాబట్టి మీరు చిదానందబ్రహ్మానంద స్వరూపులై ఎంచక్కా మీ కుక్కని జాగ్రత్తగా కుర్చీలో కూర్చోబెట్టి పక్కబట్టలు మార్చి మళ్లీ దానికి బెడ్డింగ్ ఎరేంజ్ చేస్తారు.

ఇంతలోనే దానికి ఏదన్నా పెడదామనే మహత్తర అవిడియా మీ బుర్రలోకి తొంగి చూస్తుంది. వెంటనే దాన్ని అమలు చేస్తారు. 

వేడివేడి పాలు కాచి ఒక చిన్ని ప్లేటులో పోసి దానికి అందిస్తారు. అది దాని బుజ్జినాలుక బైట పెట్టి ఆబగా ఆ పాలని ఒక నాకు నాకి.....ఆ వేడికి కెవ్వుమని.....సారి కుక్కలు కేవ్వుమనలేవు కదా....అదే అదే.....'భౌవ్వుమని' అరుస్తుంది.

మీరు....వెంటనే లీటర్ల లీటర్ల సెంటిమెంటు కార్చేసి....'అచ్చోచ్చో! నోరు కాలిందా నాన్నా? ఆగు కాస్త చల్లారబెడతా' అని ఆ కుక్క నాకిన పాలను ఉఫ్ఫు ఉఫ్ఫు అని ఊదిపెడతారు. 

ఇంతలోనే మీ మట్టిబుర్రకి ఒక మెరుపులాంటి ఆలోచన వస్తుంది. 'అరె! మన పప్పికి ఇంకా పేరెం పెట్టలేదే?' అని.

'ఏం పేరు పెడదాం?' అని అలోచించి.....వర్షంలో దొరికింది కాబట్టి మీ సినిపరిజ్ఞానం ఉపయోగించి 'త్రిష' అని పేరు పెడతారు.

'త్రిష!త్రిష!త్రిష!' అని ముమ్మార్లు ముద్దుగా పిలుస్తారు.

అది దాని రెండు చెవులు ఎత్తి మీవంక ఒక వింత ఎక్స్ప్రెషన్ ఇస్తుంది. మీరు అది అంగీకారం అనుకుని గెంతులేసి.....చేతిలో పాలు ఒలకబోసి..... అయినా కూడా నామకరణోత్సవ సంరంభంలో మునిగి ఉన్నారు కావున అస్సలు విసుక్కోకుండా ఆ ఒలికిన పాలను ఎంచక్కా శుభ్రం చేసేసి మీ త్రిషకి మూతికాలని పాలని తీసుకొచ్చి కొసరి కొసరి స్పూన్తో తాగిస్తారు.

అసలే ఆకలిమీద ఉందేమో మీ త్రిష........ శ్రీ కృష్ణుడు పూతన పాలు తాగినట్టు నిర్విరామంగా తాగుతూనే ఉంటుంది. అది చూసి మీరు మురిసి ముక్కలైపోతారు.ఇలాంటి కొన్ని అపురూప ఘట్టాల మధ్య ఆ రోజుకి అంతా బానే ఉంటుంది. మీ త్రిష బుజ్జి కళ్ళు, చిట్టి తోక, బుల్లిబుల్లి పళ్ళు మీకు తెగ నచ్చేస్తాయ్.

'నా త్రిషా అంత అందమైన కుక్క ఈ ప్రపంచంలో లేదు' అని డిసైడ్ అయిపోతారు.

క్రమంగా మీకు,త్రిషకి మధ్య బంధం దృఢమౌతుంది. తన చిలిపి చేష్టలతో,అల్లరి అరుపులతో త్రిష మీకు బోలెడు ఆనందాన్ని పంచిస్తుంది. ఇలా కొన్ని రోజులు గడుస్తాయ్!

ఒకరోజున మీరు ఆఫీసులో పని చేసేబదులు ఆంగ్రి బర్డ్స్ తెగ ఆడేసుకోవడం చూసిన మీ మేనేజరు తన పళ్ళు పరపరా కొరికి.......ఇక మీ చేతులు అరిగిపోయేలా......కళ్ళు పేలిపోయేలా......బుర్ర గిర్రున గింగిరాలు తిరిగేలా పని ఇస్తాడు. 

మీది అసలే జాలి గుండె కదా! ఈ దెబ్బకి అది ఇంకా కరిగిపోయి ఆఫీసులో అట్టే నిలవలేక ఇంటికి మోసుకేలుతుంది పనిని.

ఇంటికెళ్ళగానే మీ త్రిష మీకు ఎదురయ్యి మీ బూట్లు నాకుతుంది. మీరు అది స్ట్రెస్ బస్టర్ అనుకుని, మీ త్రిష ఇంట్లో కాలుమోపిన క్షణం నించి అన్ని ఒక రీలేసుకుంటారు. 

ముద్దుగా మీ త్రిషని ఎత్తుకుంటారు. మీ ఒళ్లో మీ ఆఫీసు కాగితాలు,పక్కనే లాప్టాపు ఉంటాయ్. మీరు ఎత్తుకోగానే మీ త్రిష సంతోషం ఆపుకోలేక మీమీదనే చిచ్చు చేసేస్తుంది. 

మీ లాప్టాపు కీబోర్డ్ మీద, మీ కాగితాలమీద ఒలికిన మీ త్రిషమ్మ ఆనంద భాష్పాలు చూసి మీకు కన్నీరు ఆగదు.

అప్పుడు మొదటిసారి మీలో అపరిచితుడు నిద్ర లేస్తాడు. అసలే ఓపిక లేక, ఆపై ఆఫీసు పని తెమలక.....రేపు బాసుకి అందించాల్సిన డాక్యుమెంట్లను మీ త్రిష ట్రాష్ లో పడేసే పరిస్థతి తీసుకురాగా........... మీ ఆగ్రహం  సాగర డ్యాం లా కట్టలు తెంచుకుని ఆ కోపంలో మీ త్రిషని పక్కన పడేసి.....

'దొంగ మోహమా! నిన్ను వర్షంలో కాపాడితే ఇదా నువ్వు చూపించే విశ్వాసం' అని మీ కుక్కకు అర్ధం కానీ భాషలో తిట్టిన తిట్టు తిట్టకుండా తిట్టి..... మీ త్రిష చేసిన ఘనకార్యాన్ని వేనోళ్ళా పొగుడుతూ....... మీ పనిలో మునిగిపోతారు.

త్రిషకి  ఏమి అర్ధం కాక..... చిన్నగా మూలుగుతూ ఇంట్లో ఒక మూలకెళ్ళి ముడుక్కుని బజ్జుంటుంది.

ఇదే ఇష్టాలు కష్టాలైపోవడమంటే!!!

ఎంతో నచ్చినది ...........మనం చిరాకులో ఉంటే ఏదన్నా చిన్న తప్పు చేసినా ఓ...విరుచుకు పడిపోయి తిట్టేస్తే......ఎవరికి నష్టం? మనకే! ఏదైనా చూసేదానిలో ఉంటుంది. ఒకప్పుడు నచ్చింది ఇప్పుడు నచ్చలేదు అంటే......ఆ వస్తువులో మార్పు కాదు మన మనసులో ఆ వస్తువు మీద ఉన్న అభిప్రాయం మారింది అని అర్ధం. 

కొత్తొక వింత...పాతొక రోత. కొత్త చింతకాయ పచ్చడి బానే ఉంటుంది. పాతబడే కొద్ది రుచి తగ్గుతుంది. అలాగని పచ్చడి మొత్తం దిబ్బలో కొట్టలేం కదా! కష్టపడి పెట్టిన పచ్చడి. ఏముంది కాస్త ఆవాలు, మెంతులు, ఎండుమిరప, ఇంగువ వేసి పోపు పెట్టేయడమే! జీవితమూ అంతే! 

ఏమన్నా అర్ధమయిందా? కాలేదా? అర్ధమయితే మహా మంచిది..............కాలేదో.....మరీ మంచిది :)

Anyways.... Happy Valentine's Day Folks!! :) 


1, ఫిబ్రవరి 2012, బుధవారం

నాకొక అందమైన డైరి కావలెను!!!

ఆ టైటిల్ ఏవిటి తల్లీ.... 'అందమైన వధువు/వరుడు కావలెను' అని ప్రకటన ఇచ్చినట్టు అంటారా.... అనేసుకోండి :) నా డైరీ వేట ఆ రేంజ్లో సాగింది మరి :)) 
అసలు సంగతేంటి అంటే.....,
నాకు చిన్నప్పటినించి ఏదో ఒకటి రాయడం అలవాటు :) మాటలకంటే రాతలనే ఇష్టపడతాను!! మాటలంటే  గాల్లోకలిసిపోతాయ్!! కానీ రాతలు అలాగే ఉండిపోతాయ్ అని నా ఫీలింగ్! ;) అందుకే చిన్నప్పుడు కనిపించిన కాగితాన్నల్లా నా రాతలతో నింపేసేదాన్ని :))) అలాగే యే ఊరికేళ్ళినా రాసే ట్రావెలాగ్...... కవితలు, కథలు, బుల్లిబుల్లి కొటేషన్లు.... ఇవన్నీ ఎక్కడపడితే అక్కడ రాసేసేదాన్ని :)))) అలా కాకుండా వాటిని అనాధల్లా వదిలేయలేక ఒక గూడు కల్పించి వాటికి ఆవాసం ఏర్పరచదలిచాను.....అదే.... 'డైరి'

ఇక అప్పటినించి మొదలయింది నా డైరి సెర్చ్! 

మొదట్లో మా డ్యాడి ఆఫీసువాళ్ళు ఇచ్చిన డైరీలో రాసుకునేదాన్ని. అవి చూడటానికి ప్లెయిన్ గా ఉన్నా.... ఒక్కోరోజుకి ఒక్కో ఫుల్ పేజి తో.....చాలా స్పేషియాస్గా ఉండేవి. కాని, రానురానూ....అవి బోర్ కొట్టేసి.... మంచి అందమైన డైరి కోసం వెతకడం మొదలుపెట్టా!! ఈ సందట్లో సడేమియాలాగా ఇంజినీరింగ్ చదివేప్పుడు ఆ 'గోదావరి' సినిమా..... అందులో కమలిని డైరి చూసి.... బాగా కుళ్ళేసుకుని అలాంటి డైరియే కావాలని పట్టుపట్టి  తిరిగిన షాపు తిరక్కుండా తిరిగా!! ఎక్కడా లేదు :(

అలా హైదరాబాదు,గుంటూరు,విజయవాడ,విశాఖపట్నం కూడా వెతికేసాక..... ఇక బెంగుళూరులో అడుగుపెట్టినప్పుడు దొరికింది 'ఫోరం మాల్' లో అచ్చు అలాంటిదే! గవ్వలతో,పూసలతో, అందమైన వర్క్ చేసిన ఫ్యాబ్రిక్ కవర్ ఉన్న బుజ్జి డిజైనర్ డైరి! ఎంతముద్దుగా ఉందో! చటక్కున చేతిలోకి తీసేసుకుని బిల్ కౌంటర్ దగ్గరికి వెళ్తున్నపుడు చూసా!! ఖరీదు అక్షరాలా ఐదొందలు అట! కేవ్వ్వ్వవ్వ్వ్వవ్!! అక్కడే మూర్చపోయా! ఎవరో నీళ్ళు చల్లి లేపి, కుర్చీలో కూర్చోపెట్టి కూల్ డ్రింక్ ఇప్పిస్తే అప్పుడు  కళ్ళు తెరిచా....

డైరికి ఐదొందలా? వీడు వీడి డొక్కు షాపు! అనుకుని....నోరు,బుగ్గలు నొక్కుకుని బైటపడ్డా!

ఐదొందలు అని వదిలేసానేగాని, ఎన్నిసార్లు అది కల్లోకొచ్చింది అనుకున్నారూఉ??  ఒక్కోసారి వెళ్లి తీసేసుకోవలనిపించేది! సర్లే లైట్ అనుకుని.... కొద్దిరోజులకి కాం అయిపోయా! కానీ ఎప్పుడు యే షాపుకి వెళ్ళినా డైరీలు కనపడతాయేమో అని తెగ వెతికేదాన్ని.

ఆ తరువాతా గుంటూరు నీలగిరిస్ షాపులో కొన్ని అందమైన పుస్తకాలు పెట్టాడు. అవి డైరీలు కాదు....జస్ట్ నోట్ బుక్స్! కానీ అందంగా ఉన్నాయ్ :) సరేలెమ్మని ఒకటి కొనేసుకుని అందులోనే నాకు తోచిన చెత్తాచెదారం అంతా రాసేదాన్ని. కానీ ఎక్కడో వెలితి ఉండేది...... రోజు రాసుకునే డైరి..... కొన్ని సంవత్సరాలయ్యాక చదువుకుంటే ఎంత బాగుంటుందో అని :) ఒకపక్క నిరాశ! ఇంకో పక్క నచ్చిన డైరి కోసం వేట!! 

అప్పటికే నాకు నేనే డిజైనర్ డైరి తయారుచేసేసుకుందాం అని కూడా డిసైడ్ అయ్యా! కానీ నా డైరికి ఉండే కనీస లక్షణాలు కూడా యే పుస్తకానికి లేకపోవడం వల్ల ఆ ప్లాన్ పక్కన పెట్టేసా!!

 అసలు ఐడియల్  డైరి అంటే ఎలా ఉండాలంటే........ అందమైన డిజైనర్ కవర్ ఉండాలి. దానికి బుల్లిబుజ్జి పూసలు,రంగురాళ్ళూ,రిబ్బన్లు లాంటి రకరకాలతో అలకరించి ఉండాలి. అలాగని గంగిరెద్దులా ఉండకూడదు...... అందమైన రంగవల్లిలా ఉండాలి. లోపల పేజీలు బుల్లి బుల్లి డిజైన్లతో..... చూడగానే పెన్నుపట్టుకుని రాసేసేలా ఉండాలి. 'ఎందుకురా బాబూ ఈ డైరి రాయడం' అని ఫీల్ అయ్యేలా ఉండకూడదు. అలాగే.... ప్రతిరోజూ బోలెడు సంగతులు రాసుకోవడానికి ఒక ఫుల్ పేజి ఉండాలి! అప్పుడైతే బోలెడు బోలెడు రాసేసుకోవచ్చు :)) ఇక ఆ పేజీల్లో ఏమన్నా స్లోగన్లు,కొటేషన్లు ఉంటే మహాచెడ్డ చిరాకు నాకు! రాస్తే గీస్తే నేను రాయాలిగాని ఎవరూ అందులో రాసి ఉండకూడదు ;) అదన్నమాట నా సింపుల్ డైరి రిక్వైర్మెంట్!! 

ఇలాంటి డైరి కోసం.....వెతగ్గా వెతగ్గా..... ఎక్కడా దొరక్క, ఇక ఇన్నిరోజులూ చేసిన వృధా చాలు..... ఇప్పటికైనా ఏదో ఒకదాంతో ఎడ్జస్ట్ అయిపోదాం.... ఎన్నిటికి ఎడ్జస్ట్ అవ్వట్లేదు..... డైరి ఒక లెఖ్ఖా? అనుకున్నా!! పోన్లే కనీసం కొంచెం బాగున్నా చాలు అనుకున్నా! ఇక గూగుల్ సర్చ్ మీద పడ్డా!

వార్నీ, అమెరికాలో జనాలు డైరిలే రాయరా? ఎంతవెతికినా అవేంటో చిన్నపిల్లల కథలపుస్తకాలు, ఆ డైరి ఈ డైరి అంటూ వస్తున్నాయిగాని, నేను రాసుకోవడానికి వీలుగా ఖాళీ డైరి ఒక్కటుంటే ఒట్టు!! అసలు వీళ్ళు డైరీని డైరి అనే అంటారా? ఇంకేదన్నా పదం ఉందా?? అసలే అమెరికాది ఉలిపికట్టె చందం కదా.... అనుకుని..... వెతగ్గా దొరికింది.... 'డే ప్లానర్' అట! నా మొహం!! సరేలే యే రాయి ఐతే ఏంటి అని.... ఆ డే ప్లానర్లు అమ్మే షాపులు చూస్తే... ఎమేజాన్ దొరికింది :)) అందులో, రకరకాల డే ప్లానర్లు ఉన్నాయ్ :) కానీ అందులో ఒకేపేజీలో నాలుగైదు రోజులకి రాసుకునేలాగా బుల్లిబుల్లి గడులు ఉన్నాయ్! :(( పోనీ 'ఒక్కోరోజుకి ఒక్కోపేజి' స్కీములో ఏమన్నా ఉన్నాయేమో చూద్దాం అంటే...... అబ్బే..... అవి 40 -50డాలర్లు ఉన్నాయ్ ;) దీనికంటే..... బెంగుళూరులో  500 బెటర్ అనిపిస్తుంది ;) [టిపికల్ ఇండియన్ మెంటాలిటీ కదా ;) ]

సరేలెమ్మని,ఏదో గుడ్డిలో మెల్లాలా నచ్చిన ఒక డే ప్లానర్ కి ఫిక్స్ అయ్యి, ఆర్డర్ ఇవ్వబోతే.... షిప్పింగ్ డైరి అంత ఖరీదు అయ్యేట్టుంది.... హయ్యో! రామా!! నేనేమన్నా మణులు అడిగానా? మాన్యాలు అడిగానా? ఒక బుల్లిబుజ్జిచిట్టిచిన్ని అందమైన డైరి కావాలన్నాను... అదీ కష్టమేనా???? హుహ్!! 

ఏంచేస్తాం!!! అంతా షిప్పింగ్ కట్టి అదే తీసుకుందాం అనుకున్నా! తీరా చూస్తే.... షిప్పింగ్ న్యు ఇయర్ తర్వాత మాత్రమె చేస్తామన్నాడు :(( హతవిధీ!! జనవరి ఫష్టు కల్లా డైరి లేకపోతె....ఇంకెక్కడ రాసుకొను??? నాకు మధ్యలో మొదలుపెట్టడం నచ్చదు :(( ఏం చేస్తాం? ఇక ఈ సంవత్సరం కూడా డైరి లేకుండానే గడిచిపోతుందేమో!! ఈ ముక్కే మా చందుతో అంటే.... 'ఆ డైరి ఆర్డర్ ఇవ్వు..... అది వచ్చేదాకా ఎక్కడో అక్కడ రఫ్ఫు రాసుకో.... డైరి వచ్చాక అందులో ఫెయిర్ చేయోచ్చు' అట!! :))))))) మహాగొప్ప సలహా కదా! ;) 'డైరిలకి కూడా రఫ్ఫు,ఫైరు రాస్తున్న ఇందు' :))) [ప్రస్తుతం ఈ పనిలోనే ఉన్నా.... ]

అంటే, మేటర్ అర్ధమయ్యిందిగా! ఈసారికి కూడా డైరికి పంగనామమే!!

హ్మ్! అదండీ సంగతి :) సో, మీకుగాని మంచి అందమైన డైరి( పైన చెప్పిన వర్ణన చూడవలెను) కానీ మీకంటికి కనపడితే...... ఇటు పంపించండి :) పండగ చేసుకుంటా :)))) 

23, జనవరి 2012, సోమవారం

మంచు ముచ్చట్లు!!

హాయ్!
ఎలా ఉన్నారండి అందరు?? ఈమధ్య బ్లాగుల వైపే చూడటం మానేసా! :(( టైం లేదు బాబోయ్... టైం లేదు.... ఏం చేస్తాం?
మూడు నెలలు అయిందనుకుంటా ఇటు వైపు వచ్చి..... ఒక పోస్టు వేసి! హ్మ్! నా పని హడావిడి.... ఇండియా ప్రయాణం.... ఆడపడుచు పెళ్లి..... అన్నీ వెరసి ఇదిగో నన్ను, నా బ్లాగును వేరు చేసేసాయి :((
ఈమధ్యలో బోలెడు సంగతులు జరిగాయి తెల్సా?? అవన్నీ మీతో చెప్పాలని ఎంత ఉబలాటంగా ఉన్నా.....  చెప్పేంత తీరిక నాకు లేదని చెప్పడానికి చింతిస్తున్నా :((

అప్పటిదాకా.... మీకోసం.... ఈ వెన్నేలసంతకం నించి జాలువారిన చిన్న జాబిల్లి తునకని జారవిడవకుండా పొదివి పట్టుకుంటారని ఆశిస్తున్నా...

అప్పుడెప్పుడో మీకు చెప్పా కదా..... నేనొక వెబ్ మ్యాగజిన్ కి ఆర్టికల్స్ రాస్తున్నా అని.... ఆ తర్వాతా రెండు,మూడు పోస్ట్లు వేసినట్టున్నా! ఇక అంతే... నా గోలలో పడిపోయి.... ఆ అప్డేట్స్ ఇవ్వడం మర్చిపోయా!!

ఇదిగోండి... చాలారోజులకి మళ్లీ ఇంకో ఆర్టికల్ తో మీ ముందుకొస్తున్నా! ఇంత ఓర్పు,సహనంతో నన్ను ఇంకా భరిస్తున్న  'ఫర్ వుమెన్' పత్రిక ఎడిటర్ గారికి ధన్యవాదాలు! :)

మంచు...మంచు..మంచు.... ఎటూ చూసినా మంచుముద్దలే! శీతాకాలం వచ్చిందంటే గుండెల్లో గుబులే! 
జివ్వుమని నరాలు లాగేసే చలిపులి మీదపడి కోరికేస్తుంటే, మన మడతమంచం పట్టాని పోలిన గుడ్డతో చేసిన కోట్లు,నానారకాల స్వెట్టర్లు, అవీ కుదరదంటే.... ధర్మల్స్ వేసుకుని ఎలాగోలా సర్దుకుపోతుంటాం ఈ చలికాలం అంతా! మరి సరదాగా కాసేపు ఈ మంచుముచ్చట్లు చెప్పుకుందామా?

మిగితా భాగం ఇక్కడ చదవండి.... 'ఫర్ వుమెన్'
చదివి ఎలా ఉందో...చెప్పడం మర్చిపోకండెం!!....